Cadaado: waa xarunta ganacsiga maamulka Galmudug waana mid ka mid ah degmooyinka gobolka Galgaduud ee bartamaha Soomaaliya.
Inkastoo ay ka mid aheyd degmooyinkii la magacaabay xiligii dawladii dhexe hadana waxa ay sameysay horumar aad u ballaaran oo xaga dhismaha,waxbarashada,ganacsiga,Isbitaalada iyo warbaahinta wixii ka dambeeyey burburkii dawladii dhexe ee soomaaliya.
Waxaa lagu tilmaamaa in ay tahay magaalada ugu bilicda iyo dhismayaasha wanaagsan guud ahaan degmooyinka gobolka Galgaduud taasi oo keentay in ay marti galiso shirkii lagu dhisay maamulka Galmudug sidoo kalena si aan kala joogsi la heyn booqasho ugu tagaan Mas’uuliyiinta dawlada federal-ka ee soomaaliya.
Madaxdii dawladihii is xig xigay ee dalka ayaa lagu xasuustaa in ay tageen magaalada Cadaado ee xarunta ganacsiga maamulka Galmudug qaarkoodna maalmo iyo habeeno halkaasi ay ku sugnaayeen.
labo ka mid ah madaxweynayaashii soomaaliya oo kala ah Sheikh Shariif Sheikh Axmed iyo Xasan Sheikh Muxamuud ayaa lagu xasuustaa in ay tageen magaalada Cadaado iyagoo hogaaminayo wufuud markaasi ku jiray dawladihii madaxda ay ahaayeen.
Waxa ay leedahay magaalada Cadaado Airpot kaasi oo leh Terminal aad u bilic wanaagsan .
Adado International Airport ayaa lagu tilmaami karaa in uu yahay mid ka mid ah garoomada ugu mashquulka badan gobolada dhexe ee soomaaliya waxaana isticmaalo shirkadaha diyaaradaha ee dalka qaarkood kuwaas oo sida siyaasiyiin iyo shacab magaalada ku wajahan.
Waxbarashada :
Magaalada Cadaado ee xarunta ganacsiga Galmudug waxaa ku yaalo 25 dugsiyo Hoose/Dhexe iyo 12Dugsiyo sare ah waxaa sidoo kale ku taalo xarunta jaamacada SIMAD ee gobolada Mudug iyo Galgaduud.
Iskuulada ku yaala magaalada waxaa ka mid ah a)Imaamu Maalik b) Hayaan c)Suldaan Axmed Nuur.
d)Cumar-Faaruuq. e) ileys f) imaamu Nawawi iyo kuwo kale.
Dadka ku dhaqan Cadaado ayaa ah kuwo lagu yaqaano barshada diinta islaamka iyadoo magaalada ay ku yaalaan Madaaris lagu barto shareecada islaamka.
Ganacsiga :
Degmadaan ganacsigeeda waxuu ku xiranyahay magaalooyinka muqdisho,beledwayne,Gaalkacyo,Hargeysa iyo Boosaaso oo ah meelaha ay leeyihiin xiriirka xaga ganacsiga ah.
Magaaladan cadaado waxaa ku yaala seelad aa u ballaaran oo lagu iibiyo xoolaha loo dhoofiyo dalalka carabta.
Waxaa ku yaalo magaalada suuqyo dadku ay ka adeegtaan oo isugu jiro kuwa dharka,Raashinka,Hilibka iyo adeeg yada kale ee dadku u baahan yihiin.
Qaar ka mid ah sshirkadaha isgaarsiinta iyo xawaaladaha dalka ayaa xarumo ka sameystay magaalada taas oo qeyb ka qaadatay hormarka ay sameynayso magaalada Cadaado.
Caafimaadka :
Waxaa magaalada Cadaado ku yaalo 2 isbitaal oo kala ah A) Adado hospital.
B) Al-Biri hospital.
Adado hospital ayaa ah isbitaalkii dawlada waxa uuna markiiba qaabili karaa bukaano aad u badan.
Isbitaalka kale ee Al-Biri ayaa ah farac uu halkaasi ku leeyahay isbitaalka Al-Biri oo xaruntiisa ugu balaaran ay ku taalo magaalada Muqdisho.
Isbitaalada ku yaala gudaha magaalada Cadaado ayaa marka laga tago dadka magaalada ku dhaqan waxa ay sidoo kale qaabilaan dadka ka yimaada deegaanada ku dhow dhow magaalada ee aysan ka jirin xarumo caafimaad oo dadka u adeega.
Warbaahinta :
Idaacaha ku yaalo magaalada waxaa ka mid ah :
a) Idaacada Codka gobolada dhexe .
b) Idaacada Al-ixsaan .
c) Radio Cadaado .
d) Goob joog FM.
e) Radio Dalsan.
f) Radio Muqdisho.
Sidoo kale magaalada waxaa wakiil wareedyo ka sameystay qaar ka mid ah idaacadaha iyo telefeshinada afka soomaaliga wax ku baahiya.
u magacaabitaanka xarunta ganacsiga Galmudug :
Magaaladan waxaa ka tali jiray isla markaana caasimad ay u aheyd maamulkii Ximan iyo xeeb oo ahaa maamul ay dhisteen dadka deegaanka, balse hada waxaa ka arimiya maamulka Galmudug oo lagu dhisay shir uu madaxweynaha Somaaliya xasan sheikh Muxamuud uu ka furay 16/04/2015-kii gudaha magaalada Cadaado.
Wareegto ka soo baxday Xafiiska madaxweynaha maamulka Galmudug C/kariim Xuseen Guuleed ayuu ku magacaabay in magaalada Cadaado ay tahy xarunta Ganacsiga maamulka Galmudug.
Madaxweynaha ayaa ku sheegay wareegtada ka soo baxday xafiis kiisa in ka gadaal markuu eegay abaalka ay ku leedahay Cadaado oo ah halka lagu dhisay maamuka uu madaxda ka yahay ,amaanka ka jiro magaalada iyo in ay tahay meel u dayaarsan qabashada xilkaasi adag uu garwaaq saday in uu u magacaabo in ay noqoto xarunta xarunta ganacsiga maamulka Galmudug.
Maalintii ka dambeysay marka ay soo baxday wareegtada waxaa gudaha magaalada ka dhacay doorashada gudoomiyaha rugta ganacsiga maamulka Galmudug.
